FELIX KARLINGER, nasciù a Minca tla Baviera ai 17 de merz dl 1920 y mort a Kritzendorf ai 27 de messel dl 2000, mess vegnì conscidré un di maiours conescidours dla etnomusicologia y dla leteratura popolara sarda. Entant y do la segonda vera mondiala òvel studié a Minca etnologia, musicologia, scienzes teatrales y romanistica. Dl 1948 òvel prejenté na tesa de dotorat soura la ciantia popolara ti Pirenei (Das Volkslied der Pyrenäen). Do desvalives sojornanzes de stude tla Sardegna òvel prejenté dl 1954 na tesa de abilitazion al ensegnament soura les cianties popolares sardes (Das sardische Volkslied). Dal 1959 enchin l 1966 fòvel professour assozié pro l istitut de filologia romanza dla université de Minca, dal 1967 enchin l 1980 professour ordinar tl istitut de filologia romanza dla université austriaca de Salzburg.
MAX LEOPOLD WAGNER, nasciù ai 17 de setember dl 1880 a Minca tla Baviera y mort a Washington ai 9 de messel dl 1962, mess vegnì conscidré ciamò aldidancuei un di maiours conescidours dl lingaz y dla cultura sarda, y ence un anter i romanisć de plu gran renomanza dl vinteisem secul. Al se ova laureé a Minca prejentan na tesa soura la formazion dles paroles tl sard. Dl 1907 òvel finì a Würzburg sia tesa de dotorat soura la fonetica di dialec dl sud dla Sardegna (Lautlehre der südsardischen Mundarten). Dal 1925 enchin l 1927 fòvel sté deplù iadesc tla Sardegna per fé n valgugn relevamenc lessicai per l Atlante Italo-Svizzero realisé y dé fora da Karl Jaberg y Jakob Jud anter l 1928 y l 1940. Do la publicazion de si manual La lingua sarda: storia, spirito e forma (1950), fova Wagner partì envers Washington, zité olache fin a sia mort intravegnuda dl 1962 se òvel dé ju con la redazion dl Dizionario Etimologico Sardo. Al lascia n'arpejon de passa 450 scric, de chisc deplù che mec dedichés al lingaz y a la zivilté sarda, enscì che Wagner pò vegnì conscidré desche "l dret autour dla gramatica sarda" (H. Kröll).
